A música no Concello de Meira

A Escola de Música de Meira fundouse no ano 2002 para cubrir a demanda de actividade musical solicitada neste Concello.

Comezouse ofertando clases de linguaxe musical, clarinete, saxo, trompeta, piano e gaita, pero na actualidade impártense doce especialidades e conta cun total de seis docentes.

No curso 2007-2008 o total de alumnos foi de 84, aínda que algúns deles estiveron matriculados en máis dunha especialidade. Delas, as de maior número de participantes son: a de gaita con 23 alumnos, acordeón con 19, clarinete con 15 e saxo con 13 alumnos.

A Escola de Música e a Banda Municipal regularizáronse no ano 2008, xa que se aprobou o "Regulamento da Escola e Banda Municipais de Música de Meira" e legalizouse a contratación dos mestres.

Nesta escola trátase de ensinar os elementos básicos da Linguaxe Musical, adquirir as capacidades precisas para interpretar as obras, dominar o vocabulario propio da linguaxe musical, participar en actividades dentro e fóra da aula e preparar aos alumnos para o acceso ao Conservatorio Profesional de Música.

No ano 2008 realizáronse varias actividades como foron os recitais de Nadal e primavera, o recital de fin de curso, as audicións das diferentes especialidades, os intercambios con outras escolas, os concertos didácticos realizados por profesores e alumnado e os concertos da Banda de Música e da Banda de Gaitas.

Para facilitar o acceso do alumnado a esta escola, o concello posúe un fondo de instrumentos musicais formado por: 9 clarinetes, 6 saxofóns altos, 3 saxofóns tenores, 1 saxofón soprano, 4 trompetas, 1 tuba, 1 trombón, 2 pianos, 4 frautas traveseiras e 1 acordeón baixo. Ademais, no Centro dispoñen tamén dun bombo, unha caixa, un xogo de pratos de choque, dous pares de baquetas de caixa e un piano acústico, unha batería e outros instrumentos de pequena percusión como maracas, triángulos, etc.

Os prazos e condicións de matrícula expóñense a coñecemento público con antelación ao comezo do curso académico, dos que se poden informar no Concello.

Ademais, no Concello de Meira existen as seguintes agrupacións musicais:

- Banda municipal de música.

- Banda municipal de acordeóns.

- Banda municipal de gaitas.

- Nove Ferreñas (pandereteiras).